Qazim Laçi i bindur: Kemi zemër dhe mentalitet për të fituar ndaj Serbisë!

Kombëtarja shqiptare ka hyrë zyrtarisht në fazën përgatitore për përballjen e zjarrtë ndaj Serbisë, e cila luhet më 7 qershor në “Arenën Kombëtare” në Tiranë. Mesfushori luftarak Qazim Laçi, një nga lojtarët më të palodhur të kuqezinjve, dha mesazhe të qarta për mentalitetin dhe përkushtimin e ekipit para kësaj sfide vendimtare për kualifikueset e Botërorit 2026.

Në një prononcim për mediet, Laçi theksoi se, pavarësisht koeficientëve dhe përllogaritjeve të jashtme, në fushë gjithçka do të vendoset nga zemra dhe lufta: “Serbia mund të jetë më e favorizuar në letra, por në fushë nuk ka favoritë. Jemi ekipe të barabarta dhe luajmë në shtëpinë tonë. Do të japim më shumë dhe nuk do të ndikohemi nga emocionet e tifozëve.”

Lidhur me mbështetjen e publikut kuqezi, Laçi shprehu besim të plotë: “Tifozët tanë janë gjithmonë pranë nesh, nuk kanë bërë kurrë trazira dhe do të jenë korrekt si gjithmonë. Do na japin forcë për të luftuar deri në fund.”

Sa i takon gjendjes fizike pas përfundimit të kampionatit, ai theksoi rëndësinë e përgatitjes mendore: “Po stërvitemi mirë fizikisht, por mbi të gjitha mentalisht. Mentaliteti është çelësi, sepse kur je i përgatitur në kokë, reagon më mirë edhe fizikisht.”

Laçi u ndal edhe te rëndësia e fokusit taktik dhe psikologjik: “Forca jonë është mbështetja e tifozëve dhe fakti që luajmë në shtëpi. Duhet të hyjmë në fushë me mendimin për tri pikët dhe të mos lëmë emocionet të na kontrollojnë. Udhëzimet e trajnerit duhet të zbatohen me përpikëri.”

Ndërsa komentoi rëndësinë e ndeshjes kundër Serbisë, ai theksoi se zemra nuk mungon në këtë skuadër: “Nuk besoj se këtij ekipi i mungon zemra. E kemi treguar vazhdimisht që kemi mentalitet dhe dëshirë për të fituar.”

Në fund, Laçi paralajmëroi se fitorja ndaj Serbisë duhet të pasohet edhe me një rezultat pozitiv ndaj Letonisë: “Nuk ka ndeshje të lehta. Duhet të kemi në mendje që kemi dy ndeshje. Tri pikët me Serbinë nuk vlejnë sa duhet nëse nuk fitojmë edhe ndaj Letonisë.”

Përgatitjet e Kombëtares nisin pasditen e së hënës në orën 17:30, me stërvitjen e parë në “Shtëpinë e Futbollit”. Kuqezinjtë janë të vendosur që këtë sfidë ta përballojnë me shpirt, disiplinë dhe, siç e tha vetë Laçi – zemër shqiptari.