Ramos: Mbyllëm një sezon të çuditshëm, kjo fanellë meriton më shumë!

Real Madrid e mbylli sezonin me një eliminim nga Champions League, teksa zhgënjimi për Sergio Ramos është i madh. Kapiteni i Los Blancos nuk pati mundësinë që të zbriste në fushën e lojës për shkak skualifikimi.

Nëpërmjet një postimi në Instagram, Ramos ka dashur të bëjë një bilanc të sezonit 2019-20, i kushtëzuar nga një ndalesë e detyruar nga emergjenca koronavirus.

“Është mbyllur një sezon atipik dhe i çuditshëm, shumë i vështirë për të gjithë. Ka një shije të hidhur dhe të ëmbël njëkohësisht, sepse ne jemi Real Madrid dhe jemi të detyruar të fitojmë gjithçka. Duhet të vlerësojmë fitoren e kampionatit, veçanërisht për rrethanat e veçanta në të cilat kemi luajtur.

Kjo fanellë dhe kjo histori meritojnë gjithmonë më shumë. Në fitore, në humbje, gjithmonë: HALA MADRID. Faleminderit për mbështetjen tuaj, edhe në distancë”, ka shkruar Ramos.