Refuzohet dorëheqja e trajnerit të Fenerbahce, por ai nuk paraqitet në stërvitje

Situata te Fenerbahçe vazhdon të jetë e tensionuar pas mbrëmjes surrealiste në Champions League ndaj Romës. Një ditë pas barazimit 1-1, kriza rreth trajnerit Ismail Kartal duket se është thelluar, pavarësisht përpjekjeve të presidentit Yıldırım për ta qetësuar situatën.

Gjithçka nisi gjatë ndeshjes me Romën, kur Kartal u godit në kokë nga një shishe e hedhur nga tribuna. Pas përfundimit të takimit, trajneri turk befasoi të gjithë duke njoftuar publikisht dorëheqjen e tij.

Por klubi nuk e konsideroi vendimin përfundimtar. Presidenti Yıldırım u përpoq ta minimizonte situatën, duke e cilësuar reagimin e Kartal si një vendim të marrë në nxehtësinë e momentit dhe duke deklaruar se trajneri do të vazhdonte në detyrë.

Sipas mediave turke, Fenerbahçe e ka refuzuar dorëheqjen dhe kishte bërë të ditur se Kartal do të drejtonte stërvitjen e radhës.

Por zhvillimi i fundit ka shtuar edhe më shumë pikëpyetjet. Kartal nuk është paraqitur në stërvitjen e planifikuar për orën 12:00, duke treguar se marrëdhënia mes tij dhe klubit mbetet e tensionuar.

Ndërkohë, Fenerbahçe ka reaguar zyrtarisht për incidentin me shishen. Klubi konfirmoi se personi përgjegjës është identifikuar dhe është marrë në pyetje me urdhër të Prokurorisë së Republikës së Anadollit në Stamboll. Ndaj tifozit është vendosur gjithashtu ndalimi i hyrjes në stadium.