Reja ankohet për fushën: S’bënim dot 2-3 pasime radhazi!

Trajneri i Kombëtares, Edy Reja, foli pas triumfit në shtëpi ndaj Kazakistanit. Në prononcimin e tij strategu italian u shpreh i pakënaqur për kushtet e terrenit të stadiumit “Air Albania”, ku sipas tij nuk është i përshtatshëm dhe se lojtarët kanë shprehur ankesa. Reja u shpreh optimistë për sfidën e fundit kundër Bjellorusisë, që do të vendosë për kreun e grupit.

“Ishim 2-0, goli i pësuar na hapi probleme. E kishim nisur ndeshjen mirë, rikuperuam më pas. Nga minuta e 25-të ky gol na kushtëzoi. Ata morën shumë zemër. Skuadrat u hapën shumë në fushë, u krijua një diferencë mes lojtarëve. Nga pikëpamja fizike ata ishin superiorë, zgjodha në mesfushë lojtarë që e luanin mirë topin, për të pasur superioritet në mesin e fushës.

Cikalleshi? E njoh dhe na mungoi në ndeshjet e para. Është një lojtar që punon shumë në fazën ofensive dhe shënon. E gjithë skuadra nuk arrin të shprehet maksimalisht për shkak të fushës. Lojtarët më janë ankuar, e kanë të vështirë të bëjnë 2-3 pasime radhazi. E kam të vështirë të them kush ishte më i miri.

Sfida e radhës? Nuk ka 2 pa 3. Nuk do të vlente kjo fitorja, nëse nuk triumfojmë ndaj Bjellorusisë. Duhet të përgatitemi mirë se Bjellorusia është një skuadër shumë më e fortë fizikisht se Kazakistani, duhet të punojmë shumë për këtë ndeshje.

Formacioni? Këto ndeshjet na kanë ndihmuar shumë. Ka pasur shumë hapësirë për të rinjtë, Selahi, Kallaku, Doka. Kemi aktivizuar dhe lojtarë të tjerë. Në fund fare do të nxjerrim konkluzionet. Edhe në këtë ndeshje do të vazhdojmë siç kemi bërë dhe më pas do të bëjmë vlerësimet. Kemi pasur debutues edhe si Broja, të cilët kanë nevojë për minuta, më pas do të bëjmë vlerësimet”, deklaroi strategu italian pas ndeshjes.