Situatë e komplikuar për Richarlison te Tottenham. Sulmuesi brazilian, i cili prej javësh është në qendër të zërave të merkatos, është lënë jashtë listës së skuadrës për Premier League nga trajneri Roberto De Zerbi. Vendimi konfirmon se 29-vjeçari nuk është pjesë e planeve të teknikut italian për këtë sezon.
Richarlison tashmë duhet të gjejë një zgjidhje për të ardhmen e tij. Edhe pse merkatoja në Premier League është mbyllur, disa tregje jashtë Anglisë mbeten të hapura, ndaj braziliani mund të tentojë një transferim të minutës së fundit. Nëse nuk largohet, alternativa është të qëndrojë jashtë fushave deri në janar. Trabzonspori është një prej destinacioneve që është përmendur si mundësi për të.
Ndërkohë, një tjetër vendim i rëndësishëm vjen nga Liverpooli. Federico Chiesa nuk do të jetë pjesë e listës së skuadrës për fazën e ligës së Champions League 2026/27. Trajneri i ri, Andoni Iraola, ka vendosur të mos e përfshijë italianin në listën e dorëzuar në UEFA.
I njëjti fat ka prekur edhe mesfushorin japonez Wataru Endo, i cili gjithashtu është lënë jashtë listës së Liverpoolit për kompeticionin më prestigjioz evropian.
Për Chiesa-n, ky është një tjetër sinjal i vështirë në aventurën e tij në “Anfield”, pasi edhe në sezonin e kaluar pati vështirësi për të gjetur hapësira të rregullta. Tashmë, nën drejtimin e Iraolës, situata nuk duket të ketë ndryshuar.