Rikthimi i Matetës në shënjestrën e Juventusit: A do të jetë kjo hera e suksesshme për sulmuesin francez?

Ku kishim mbetur? Në janar, Jean-Philippe Mateta ishte fillimisht pranë Juventusit, më pas Milanit, por në fund, për shkak të disa problemeve në gju, ai nuk u largua nga Londra. Tani, sulmuesi francez rikthehet në shënjestrën e bardhezinjve, të cilët po përballen me rinovimin e komplikuar të Dusan Vlahovic dhe janë në pritje të takimit me PSG-në, pas finales së Champions League, për të provuar të rikthejnë në Torino Kolo Muani. Pikërisht Kolo Muani, të cilit Mateta, me një parakalim të papritur, i ka marrë vendin në Kupën e Botës. A do të jetë kjo hera e tretë e suksesshme për ta parë atë protagonist në Serie A?

Kanë kaluar katër muaj e gjysmë që kur drejtuesit e Juventusit kishin identifikuar francezin e lindur në vitin 1997 si qendërsulmuesin për t’ia sjellë trajnerit Spalletti, me perspektivën e menjëhershme për të zëvendësuar Vlahovicin e dëmtuar dhe atë të ardhshme për t’u bërë pika kyçe e sulmit. Një qendërsulmues fizik, aq i dëshiruar nga Spalletti. Operacioni ishte ndërprerë për shkak të kërkesave të larta të Crystal Palace, të cilët nuk e mirëprisnin një formulë huazimi me detyrim blerjeje të kushtëzuar, si dhe të agjentëve të lojtarit, aq sa Juventusi më pas u hodh te alternativa En-Nesyri. Disa javë më vonë, ishte Milani ai që kishte në dorë Matetën, por marrëveshja dështoi për shkak të mendimit të mjekëve kuqezinj, të cilët kishin konstatuar probleme në gjurin e sulmuesit, të cilat e detyruan atë të bënte një operacion. Një rrezik shumë i madh përballë një investimi prej 35 milionë eurosh.

Kështu, Mateta mbeti te Crystal Palace dhe, pasi zgjodhi rrugën e terapisë konservative dhe humbi 8 ndeshje mes Premier League dhe Conference League, ai filloi ngjitjen e tij: 5 gola mes mesit të marsit dhe fundit të sezonit, duke përfshirë edhe golin vendimtar në finalen e kompeticionit të tretë evropian kundër Rayo Vallecano. Dhe kështu, ai bindu edhe Didier Deschamps, i cili i rezervoi atij (dhe jo Kolo Muani) vendin e fundit në avionin e Francës për në Kupën e Botës. Për shkak të kontratës që i skadon në vitin 2027, Juventusi në javët e fundit është rikthyer të mendojë për të: kërkesa e anglezëve është ende e lartë, mbi 30 milionë euro, por aftësia negociuese tani është më e vogël. A do të jetë hera e tretë ajo e duhura për ta parë Matetën më në fund në Serie A?

Marrë nga La Gazzetta dello Sport