Ronaldinho është zyrtarisht një lojtar i Ravenna-s. Ish-ylli brazilian ka vendosur të rikthehet në futbollin profesionist italian në moshën 46-vjeçare, në një lëvizje që ka tërhequr vëmendjen e madhe të tifozëve dhe mediave.
Bëhet fjalë për një operacion që duket se shkon përtej aspektit sportiv. Objektivi i Ronaldinhos është të shënojë të paktën një gol me fanellën e Ravenna-s, duke synuar të vendosë një rekord të ri në futbollin profesionist italian.
Natyrisht, në moshën 46-vjeçare, është e vështirë të imagjinohet që ish-fituesi i “Topit të Artë” të përballojë ritmin e një kampionati profesionist. Për këtë arsye, rikthimi i tij shihet më shumë si një kombinim mes spektaklit, marketingut dhe një aventure simbolike.
Vetë Ronaldinho ka treguar entuziazmin për këtë kapitull të ri.
“Thashë po për Ravenna-n për të gjithë miqtë që janë këtu dhe që kanë ndërtuar një projekt shumë të bukur. Shpresoj që gjithçka të shkojë mirë. Jam shumë i lumtur që jam këtu dhe shpresoj të lë shumë nga vetja”, u shpreh braziliani.
Presidenti i klubit, Cipriani, e ka përmbledhur në mënyrë simbolike objektivin e kësaj lëvizjeje.
“Ai ëndërron golin dhe ne e duam atë. Ndoshta goli i tij do të na ndihmojë të shembim stadiumin dhe të ndërtojmë një të ri. Ëndrra është të rikthehemi në Serie A me të si ortak. Ai tashmë u ka sjellë gëzim dhe lumturi të gjithë tifozëve”, deklaroi Cipriani.