Ronaldo “fenomeni”: Lukaku lëviz edhe pemët, Interi ka gjithçka për të fituar titullin!

Derbi i Italisë, Inter-Juventus, nga këndvështrimi i Ronaldo “Fenomenit”. Në një intervistë për “Gazzetta dello Sport”, ai dha mendimin e tij për përballjen e të dielës në mbrëmje.

“E di, por le të bëjmë një marrëveshje: do të flasim për të nëse nuk merremi historinë e penalltisë së Ceccarinit, të cilën nuk mund ta duroj më. Nëse ka ende probleme me VAR-in në Itali, si në Spanjë, kjo do të thotë që lidhet me polemikat e arbitrimit, çka nuk do të ndryshojë kurrë në të vërtetë. Unë e vendos zemrën time në paqe, siç nuk mund ta bëja atëherë.

Është më shumë se gjysma e kampionatit për t’u luajtur? Është e vlefshme vetëm për vetëvlerësimin e skuadrave, për të kuptuar sesa të gatshëm jeni për të luftuar në atë nivel. Nëse, nga ana tjetër, do të thuash që vetëm këto dy skuadra do të luajnë për titull, atëherë në rregull, por Milanin ku do ta vendosim …

Ky sezon është shumë i veçantë: një kampionat me një surprizë të bukur. Dhe Milani po më befason: futboll sulmues, lojtarë të shpejtë, cilësorë. Pastaj, Ibrahimoviç: ai gjithmonë ka thënë se më konsideron idhull. E konsideroj ndoshta një rast unik, një shembull që është i mirë për futbollin. Edhe sikur të mos kisha pasur të gjitha dëmtimet që kam pasur, kurrë nuk do të kisha arritur moshën 40 vjeç në fushë dhe në majë, si ai. Asnjëherë.

Ronaldo për Juven apo Lukaku për Interin, kush peshon më shumë? Në total, Lukaku me siguri. Ai lëviz edhe pemët… Kur ke një lojtar të tillë, e ke të vështirë të mos mbështetesh tek ai. Sidomos te dikush si Lukaku. Nëse ai pothuajse shënon një gol në çdo ndeshje, është mirë për t’u mbështetur. Thjesht mos prisni që të qëndisë me topin në këmbë.

Lautaro Martinez? Më pëlqen, sepse nuk ka frikë nga asgjë. Nëse ti shpërqendrohesh për një moment, ai nuk të fal. Ka një lehtësi në futboll, që jo shumë e kanë atë. Ai e ndjen golin: një sulmues i pastër, me sytë e finalizuesit.

Kritika për Conten? Dikush në Milano e bëri, duke gjykuar nga disa mesazhe që më vijnë herë pas here. Unë e di se një juventin nuk pranohet lehtë tek Interi. Fati i trajnerëve lidhet me profesionalizmin dhe Conte nuk bën përjashtim. Pirlo gjithashtu mori stolin e Juventusit pa përvojë, apo jo?

Koha që Interi të fitojë titullin tani? Unë nuk jam duke thënë se do ta fitojë, as se duhet ta bëjë medoemos; por që ka gjithçka për ta fituar titullin.

Përforcimi më i goditur? Hakimi, një lojtar i jashtëzakonshëm, të cilin Reali gaboi që e humbi. Herë pas here mendoj: Ronie, imagjinoni ju dhe Hakimi… Një nga blerjet më të mira të Interit në dhjetë vitet e fundit.

Për kë vini bast për titullin? Unë jam i njëanshëm, por si jo tifoz do të thosha që Juve është e fortë. Ama, Interi mund të besojë te titulli këtë vit. Dhe ndoshta do ta festojmë titullin me një ndeshje të bukur miqësore me Valladolidin tim, nëse Koronavirusi na e lejon”, deklaroi Ronaldo fenomeni.