Rrëfimi i veçantë i Granit Xhakës: E urrej të jem vetëm, më duhen njerëz afër!

Granit Xhaka ka bërë një rrëfim interesant gjatë një interviste për BBC Sport, duke folur hapur për anën e tij emocionale dhe ndikimin që karriera në futboll ka pasur në jetën personale. Mesfushori shqiptar ka pranuar se e urren vetminë dhe se ka nevojë të vazhdueshme për praninë e njerëzve të afërt.

“E urrej të jem vetëm. Nuk më pëlqen të jem i vetmuar. Mendoj se kjo lidhet me karrierën time në futboll dhe me disa momente jo të mira që kemi kaluar”, ka thënë Xhaka.

Futbollisti ka theksuar se familja është pika e tij më e fortë dhe se mungesa e saj e ndikon shumë në përditshmëri: “Jam një person që, nëse familja ime nuk është këtu, më duhen njerëz afër. Kam nevojë të kem dikë pranë”.

Xhaka ka ndarë edhe një detaj personal që tregon sa e vështirë është për të të qëndrojë vetëm: “Për shembull, nëse gruaja ime apo fëmijët nuk janë në shtëpi, unë nuk fle në dhomën e gjumit. Fle në sallon apo diku tjetër. Ndihem shumë keq”.