Rummenigge: Interi favorit, por Bayerni mund të bëjë mrekullinë

Në prag të sfidës së kthimit mes Interit dhe Bayern Munich në çerekfinalet e Champions League, Karl-Heinz Rummenigge, ish-lojtar i të dyja klubeve, ka dhënë mendimin e tij për “La Gazzetta dello Sport”.

“Bayernit do t’i duhet një mrekulli e vogël për të përmbysur rezultatin e ndeshjes së parë – Interi ishte shumë i fortë në Mynih dhe më la përshtypje shumë të mirë. Ndeshja në ‘San Siro’ do të jetë e vështirë, por jo e pamundur”, u shpreh ai.

Rummenigge pranon se përmbysja është ende e mundur, duke qenë se një gol do ta çonte takimin të paktën në kohë shtesë: “Në një ndeshje të vetme çdo gjë mund të ndodhë, por Bayernit i duhet një natë perfekte.”

Ai gjithashtu komentoi mbi strategjinë në sfidën e parë: “Pas golit të Muller, do të ishte zgjedhje më e zgjar që të ruanim barazimin. Në vend të kësaj, tentuam fitoren me çdo kusht dhe pësuam një gol që mund të na kushtojë kualifikimin.”