Sadiku: Ishim të lodhur nga ndeshja e parë, na mungoi një penallti!

Armando Sadiku u rikthye të luajë për kombëtaren dhe qëndroi në fushë për 90 minuta në humbjen 0-1 ndaj Lituanisë. Sulmuesi u pa shumë pak në fushë dhe ashtu si pjesa tjetër e skuadrës, teksa e pranoi se ishte larg gjendjes më të mirë pas ndeshjes.

“E kishim përgatitur mirë ndeshjen, por ndikoi pak lodhja në ndeshjen e parë dhe nuk arritëm të shkonim të freskët në 30 metrat e fundit. Kjo ndikoi qartë edhe në finalizimin e aksioneve.

Edhe unë personalisht vija nga një periudhë shumë e gjatë pushimesh dhe vuajta, por u mundova të jap më të mirën. Të gjithë u përpoqën, por ata u mbrojtën mjaft mirë dhe nuk na lanë asnjë rast.

A kishte kontakt në momentin që u rrëzuat në zonë? Kishte kontakt dhe unë u përpoqa të rrëzohem menjëherë. Mendoj se po të kishte VAR, do të ishte dhënë penallti”, deklaroi Sadiku.