San Marino-Shqipëri, FSHF ka disa udhëzime për tifozët shqiptarë

Federata Shqiptare e Futbollit ka publikuar udhëzimet për tifozët kuqezi që do të ndjekin nga afër ndeshjen San Marino–Shqipëri, e cila do të zhvillohet sot në orën 20:45, në “San Marino Stadium”. FSHF u kërkon tifozëve që do të udhëtojnë drejt stadiumit të planifikojnë në kohë lëvizjen dhe të respektojnë udhëzimet për aksesin dhe parkimin.

Një nga rrugët pranë stadiumit, Rancaglia, do të jetë e mbyllur për qarkullimin e automjeteve, por do të mbetet e aksesueshme për këmbësorët. Tifozët shqiptarë që do të udhëtojnë me automjetet e tyre këshillohen të përdorin rrugët La Ciraulla ose Costa del Bello, për të mbërritur te zona e dedikuar e parkimit.

Parkimi i rezervuar për tifozët shqiptarë ndodhet pranë “Stadio di Baseball di Serravalle”, por numri i vendeve është i kufizuar. Për këtë arsye, FSHF këshillon tifozët që të shfrytëzojnë edhe hapësirat e tjera publike të parkimit në qytet.

Ndërkohë, pika e grumbullimit të tifozëve shqiptarë para ndeshjes do të jetë në Via Rancaglia. Federata u bën thirrje tifozëve kuqezi që të nisen në kohë drejt stadiumit dhe të ndjekin udhëzimet e autoriteteve, në mënyrë që hyrja në impiant dhe organizimi para ndeshjes të zhvillohen pa probleme.

Shqipëria zbret në fushë në orën 20:45, me synimin për të marrë një tjetër rezultat pozitiv pas fitores 2-0 ndaj Bjellorusisë.