Seferi: Kombëtarja synon vendin e parë, nuk duhet të nënvlerësojmë askënd!

Taulant Seferi ka dalë në konferencën për shtyp para ndeshjeve të radhës të Kombëtares shqiptare në Ligën e Kombeve, duke e bërë të qartë ambicien e kuqezinjve për të synuar vendin e parë në grup.

Sulmuesi theksoi se objektivi kërkon përqendrim maksimal në çdo takim dhe respekt për çdo kundërshtar, ndërsa foli edhe për ndryshimet që ka sjellë trajneri i ri, Rolando Maran. Seferi vlerësoi filozofinë më sulmuese, qarkullimin e topit dhe presingun, duke shprehur besimin se grupi mund të arrijë rezultate pozitive.

Objektivi vendi i parë, sa ju vendos në presion? – Sa i përket objektivit tonë si vendi i parë, padyshim objektivi jonë i Kombëtares është vendi i parë, por ne, si gjithë ekipi së bashku duhet të shohim ndeshje për ndeshje, sepse në futbollin e sotëm nuk ka më ndeshje të lehtë. Duhet të japim maksimumin, të fokusohemi 100% dhe të shohim ndeshje pas ndeshje. Shpresoj që në fund të jetë kështu, siç të gjithë po flasin dhe do jetë e mira për të gjithë neve. Ajo që ne na ngel është që ne të punojmë fortë, të jemi të përqendruar dhe të shohim ndeshje pas ndeshje.

Si po shkojnë përgatitjet për ndeshjet? – Ndryshimi është sepse trajneri Maran dëshiron që të luajmë me topin, dëshiron më shumë futboll sulmes dhe do që ekipi të bëjë presing. Për ne sulmuesit është më mirë kur bëjmë presing dhe kur e kemi topin më shumë. Këto ditë kemi punuar më shumë me topin. Përpara kemi qenë më shumë të fokusuar në aspektin mbrojtës, e kemi pritur kundërshtarin më shumë. Shpresoj që këto që po punojmë me trajnerin Maran, të na dalin edhe në lojë, sepse besoj që po na pëlqen të gjithë futbollistave ky sistem. Shpresoj që t’ia dalim me sukses.

Si e shihni pozicionin tuaj me trajnerin Maran në ekip? – Trajneri ia jep vlerësimin të gjithë futbollistëve. Nëse unë do luaj titullar apo jo, e di trajneri. Padyshim, unë besoj që i ka pëlqyer loja ime që ka parë në dy ndeshje miqësore dhe në kampionat. Unë jam këtu, trajneri vendos nëse do të luaj, apo do të jem në bankë rezervë. Do të vlerësoj çdo vendim të trajnerit. Ne jemi të kënaqur, pikë së pari sepse jemi në Kombëtare, pastaj gjërat e tjera dhe është grupi që do të sjelli sukseset apo fitoret.

Futeni si favoritë në këtë ndeshje, si e përgatit Shqipëria një ndeshje ndryshe? – Siç e thashë më parë, padyshim objektivi jonë është vendi i parë, ne duhet të jemi të fokusuar në çdo ndeshje. Nuk duhet të nënvlerësojmë asnjë kundërshtar, sepse sot çdo kundërshtar është shumë i fortë dhe kur të futesh në fushë je 11 vs 11. Duhet vlerësuar në maksimum çdo kundërshtar që i kemi në grup. Kemi shumë besim sepse e kemi grupin shumë të mirë. Kemi shumë besim që do të dalim me sukses.