Sherif Kallaku transferohet në Kroaci, zbulohen detajet e kontratës

Sherif Kallaku është larguar nga Teuta për t’u transferuar në Kroaci. Këtë gjë e ka zyrtarizuar klubi durrsak i futbollit përmes një njoftimi publik: “KF Teuta njofton sot arritjen e marrëveshjes të transferimit të Sherif Kallakut në ekipin e Lokomotiva Zagreb, Kroaci. Sherif Kallaku pritet t’i bashkohet ekipit të Lokomtivës ditën e premte. Fantazisti i Teutës, pasi të kryejë vizitat mjekësore, do të bashkohet me klubin e Lokomotiva Zagreb, me të cilin ka nënshkruar një kontrate 4-vjeçare.

22-vjeçari, i cili u shpall fitues i Kupës së Shqipërisë me Teutën, do ta vijojë aventurën e tij të re në Kroaci. Pas 2 vitesh me blutë, skuadër me të cilën dhuroi performanca shumë pozitive, duke qenë njëkohësisht edhe pjesë e ekipit tonë përfaqësues, Kallaku tashmë do të provojë eksperiencën e parë jashtë vendit, në radhët e Lokomotiva Zagreb”.

Teuta do të përfitojë 150 mijë euro, duke ruajtur edhe të drejtat mbi 20% të kartonit të lojtarit në rast të një transferimi tjetër. Te skuadra në fjalë kanë luajtur disa shqiptarë.