Sherri Vlahovic dhe Skriniar krijon polemika të reja, Besiktas ankohet për hetimin disiplinor

Përplasja mes dy ish-lojtarëve të Serie A, Dusan Vlahovic dhe Milan Skriniar, gjatë derbit Fenerbahce-Besiktas, vazhdon të prodhojë polemika në futbollin turk.

Sulmuesi serb i Besiktasit është dërguar në Komisionin Disiplinor të Superligës turke, ndërsa Skriniar, mbrojtësi i Fenerbahces dhe ish-kapiteni i Interit, nuk është ndëshkuar për episodin.

Sipas autoriteteve të kampionatit turk, Vlahovic ka shfaqur një sjellje që nuk përputhet me parimet e fair-play-t. Vendimi ka shkaktuar zemërimin e drejtuesve të Besiktasit, të cilët kanë reaguar përmes një deklarate zyrtare.

“Referimi i Vlahovic në Komisionin Disiplinor është një dëshmi konkrete se si futbolli turk po menaxhohet larg parimeve të drejtësisë dhe barazisë. Është e papranueshme që lojtari ynë të referohet, ndërsa futbollisti i skuadrës kundërshtare, i cili me veprimet dhe fjalët e tij e provokoi gjatë gjithë ndeshjes, të mos përballet me të njëjtën masë”, thuhet në reagimin e klubit.

Besiktas shkon edhe më tej, duke akuzuar Federatën Turke të Futbollit dhe organet e saj për qëndrim armiqësor ndaj klubit.

“Federata dhe organet e saj kanë treguar edhe një herë qëndrimin e tyre armiqësor ndaj Besiktasit, siç dëshmohet edhe nga ky episod”, përfundon deklarata.

Tashmë pritet të shihet nëse çështja do të sjellë një masë konkrete ndaj Vlahovic dhe nëse polemikat rreth derbit do të vazhdojnë edhe jashtë fushës.