Shqipëri-Maqedoni, dalin në shitje biletat e ndeshjes

Federata Shqiptare  e Futbollit (FSHF) ka hedhur në treg biletat për ndeshjen e parë kualifikuese të Kampionatit Botëror ‘Rusi 2016’, ku Shqipëria luan ndaj Maqedonisë.

Pas etheve të Kampionatit Evropian, tani në Kombëtaren shqiptare kanë nisur edhe ethet e kualifikueseve te Botërorit 2018 që do të mbahet në Rusi.

Vetëm disa javë pas nisjes së shitjes së biletave ‘online’ për ndeshjen e parë kualifikuese, ku më 5 Shtator kuqezinjtë do të presin në “Loro Boriçi” Maqedoninë, FSHF-ja ka njoftuar se biletat kanë nisur të shiten edhe në dyqanin zyrtar të institucionit që drejton futbollin në vend.

Kështu, në treg kanë dalë bileta për të gjithë sektorët e stadiumit, duke përfshirë këtu edhe tribunën VIP.

Çmimet e biletave nisin nga 1,000 lekë të reja për tribunat mbrapa portave, për të vazhduar me 1,500 lekë në tribunat anësore C1, C5 dhe E1, E5.

Ndërsa, në katër sektorët e tribunës D, biletat kushtojnë nga 2,000 deri në 3,000 lekë të reja dhe në tribunën qendrore në sektorët A dhe B çmimi shkon në 8,000 lekë të reja.

Gjithashtu, për tifozët besnik është edhe mundësia për të përfituar paketat e abonimit në ndeshjet e kuqezinjve, nëpërmjet të cilës mbështetësit e Kombëtares do të përfitonin çmim 15% më të ulët.