Futbollistët shqiptarë që aktivizohen në kampionatet europiane kanë lënë gjurmë edhe këtë javë, me paraqitje pozitive, gola dhe asiste me skuadrat e tyre. Në qendër të vëmendjes ishte Ernest Muçi, i cili zhvilloi një ndeshje fantastike me Trabzonsporin, ndërsa Cristian Shpendi dhe Indrit Tuci u bënë gjithashtu protagonistë me realizimet e tyre.
Muçi ishte padyshim një nga emrat më të spikatur të javës në Turqi. Sulmuesi shqiptar dha fillimisht një asist në fundin e pjesës së parë në sfidën ndaj Gaziantepit, ndërsa në minutën e 61-të realizoi një gol të bukur nga distanca. Kontributi i tij ishte vendimtar në suksesin 2-0 të Trabzonsporit. Me këto statistika, Muçi numëron tashmë tre gola dhe gjashtë asiste në kampionat gjatë këtij sezoni.
Në Itali vazhdon të impresionojë Cristian Shpendi. Sulmuesi i Çezenës shënoi golin e barazimit në transfertën ndaj Südtirol, duke rikthyer skuadrën e tij në lojë në minutën e 65-të. Takimi u mbyll në shifrat 1-1, ndërsa Shpendi po kalon një sezon mjaft pozitiv, me tetë gola të realizuar në 10 ndeshje kampionati.
Edhe Indrit Tuci pati arsyen e tij për të festuar. Sulmuesi shqiptar vendosi derbin mes Mariborit dhe Olimpija Ljubljanës, duke realizuar golin që i dha drejtimin përfundimtar përballjes në kampionatin slloven. Ky ishte realizimi i katërt i Tucit në kampionat për këtë sezon.
Ndërkohë, java ishte pozitive edhe për shumë prej lojtarëve të tjerë të Kombëtares shqiptare, të cilët vijuan të jenë pjesë e rëndësishme e formacioneve të skuadrave të tyre. Si titullarë u aktivizuan Etrit Berisha, Berat Gjimshiti, Ardian Ismajli, Marash Kumbulla, Klisman Cake, Samuele Sina, Stavro Pilo, Kristjan Asllani, Ylber Ramadani, Qazim Laçi, Juljan Shehu, Arbër Hoxha, Nedim Bajrami, Jasir Asani, Taulant Seferi, Sabah Kerjota dhe Rey Manaj.