Si Del Piero, Juventus i jep numrin 10 turkut dhe bën gati rinovimin

Kenan Yildiz do të rinovojë me Juventusin dhe fanellën me numrin 10. Palët janë dakorduar përfundimisht, deri në atë pikë sa të vënë në lëvizje “makinerinë” për statusin zyrtar.

Klubi bardhezi, në fakt, ka kohë deri në prag të ditës së parë të kampionatit për të caktuar zyrtarisht të gjithë numrat e fanellave të lojtarëve në skuadër, pa asnjë mundësi ndryshimi të tyre në vazhdim.

Turku përmbush ëndrrën e tij për të mbajtur fanellën e kampionëve të historisë së Juventusit, duke përfshirë idhullin e tij Alex Del Piero. Diskutimi për zgjatjen e kontratës ishte ndezur në fillim të verës.

Yildiz kishte ende kontratë deri në vitin 2029, por me një pagë jo adekuate për nivelin e tij. Mesfushori-sulmues, me propozimin e klubit, do të shkojë nga 300 mijë euro në një milion në sezon, shumë e cila mund të rritet me përmbushjen e disa kushteve.

Në një moment, negociatat ishin ndalur papritur pikërisht për përcaktimin e shpërblimeve të përfshira në kontratë. Ishte vetë djaloshi, personalisht, që e donte fort zgjatjen e kontratës, për të hyrë menjëherë në rrethin e kufizuar të kampionëve me numrin 10 të Juventusit.