Sulm brutal në Nice: Lojtarët goditen me shkelma e grushta nga 400 tifozë të tërbuar

Një situatë e rëndë ka ndodhur në Nice mbrëmjen e së dielës, ku rreth 400 tifozë të ekipit pritën lojtarët pas kthimit nga ndeshja me Lorient. Humbja 3-1, e cila shënoi disfatën e gjashtë radhazi për skuadrën, shkaktoi një shpërthim zemërimi nga mbështetësit, duke e transformuar një takim që supozohej të ishte diskutim në një sulm të dhunshëm.

Në qendër të agresionit ishin futbollistët Jeremie Boga dhe Tarem Moffi. Ata u bënë objekt i një sulmi brutal, duke pësuar goditje me shkelma në pjesët e poshtme të trupit dhe grushta. Përveç dhunës fizike, lojtarët u përballën edhe me fyerje të rënda me bazë racore dhe u pështynë nga turma e tërbuar.

Incidenti nisi kur dy tifozë hipën në autobusin e skuadrës për të shprehur pakënaqësinë e tyre lidhur me performancën e ekipit. Më pas, situata përshkallëzoi kur lojtarët zbritën nga automjeti dhe u gjendën përballë grupit të madh të tifozëve të irrituar. Zemërimi nuk u drejtua vetëm ndaj futbollistëve; edhe stafi teknik dhe drejtori sportiv, Florian Maurice, u vunë në shënjestër të të njëjtit trajtim agresiv.

Si pasojë e këtij sulmi, dy lojtarët e prekur, Boga dhe Moffi, kanë bërë një denoncim zyrtar. Për shkak të goditjeve të marra, atyre u është dhënë një leje pesëditore për t’u rikuperuar, duke munguar kështu në seancën stërvitore të së hënës. Klubi i Nice ka reaguar menjëherë përmes një komunikate zyrtare, duke dënuar ashpër këtë akt.

Në deklaratën e klubit thuhet se ndërsa frustrimi i tifozëve për rezultatet e dobëta është i kuptueshëm, incidentet e ndodhura janë të papranueshme. “Të dielën, kur u kthyem nga Lorient, skuadra u prit nga një grup tifozësh te qendra stërvitore… Disa anëtarë të klubit u vunë në shënjestër. Nice iu ofron atyre mbështetjen e plotë dhe dënon në mënyrë kategorike akte të tilla,” theksohet në komunikatë, duke konfirmuar mbështetjen për viktimat.