Ter Stegen operohet me sukses, por nuk dihet sa do qëndrojë jashtë fushave

Barcelona ka bërë një njoftim zyrtar ku konfirmon se gjithçka ka shkuar sipas planit për portierin gjerman, Andre ter Stegen. “Gardiani” 31-vjeçar ka udhëtuar për në Bordeaux për t’ju nënshtruar një operacioni në shpinë, pasi kishte dhimbje kronike.

Operacioni është zhvilluar me sukses, siç bën të ditur klub i Barcelonës në një deklaratë. Megjithatë, njoftimi nuk ofron shumë detaje rreth natyrës së problemit të shpinës së portierit.

“Lojtari i ekipit të parë, Marc ter Stegen, i është nënshtruar me sukses një operacioni për problemet e tij në pjesën e poshtme të shpinës. Procedura u krye nga Dr. Amelie Leglise nën mbikëqyrjen e Shërbimeve Mjekësore të Klubit, në Klinikën Sportive Bordeux Merignac. Ai është jashtë dhe rikuperimi i tij do të përcaktojë disponueshmërinë e tij”, thuhet në njoftim.

Media katalanase ka theksuar mungesën e informacionit të detajuar lidhur me dëmin dhe planin e rikuperimit të portierit gjerman. Klubi do të vazhdojë të monitorojë situatën për të përcaktuar disponueshmërinë e tij në të ardhmen.