Tregu i Napolit merr frymë: Lukaku gati për Fenerbahçen, Badiashile dhe Favasuli në fokus

Marrëveshja mes Romelu Lukakut dhe Fenerbahçes është drejt finalizimit, duke shënuar një kthesë të pritur prej ditësh. Leja shtesë dy-tre ditore e dhënë nga Napoli për sulmuesin shërbeu si kohë teknike për të avancuar fazën e fundit të negociatave. Lukaku ka pranuar ofertën e klubit turk dhe Napoli nuk do të kundërshtojë largimin e tij. Madje, klubi italian mund të ulë edhe kërkesat për kartonin e lojtarit, megjithëse i duhen të paktën 10-12 milionë euro për të shmangur humbjet kapitale, si dhe duhet t’i kalojë 40% të shumës së rishitjes Chelseat, sipas marrëveshjes së verës 2024. Pika më thelbësore për Napolin është largimi i Lukakut dhe çlirimi nga paga e tij bruto prej 11 milionë eurosh, e cila ka bllokuar tregun e transferimeve të klubit.

Që nga mbrëmja e djeshme, Fenerbahçe dhe Napoli kanë hyrë në detajet e operacionit, i cili pritet të mbyllet brenda 24 orëve të ardhshme. Klubi turk ofron një tërheqje të ndryshme nga MLS, duke i dhënë Lukakut mundësinë e fundit për të luajtur në Champions League, pasi aktualisht po përballet me raundin e tretë eliminator dhe ka fituar ndeshjen e parë 2-0. Përveç kësaj, Fenerbahçe ka fuqinë ekonomike për të plotësuar kërkesat e “Big Rom”. Ndërkohë, agjenti Federico Pastorello është rrugës për në Castel di Sangro, zyrtarisht për të biseduar edhe me klientë të tjerë si Meret dhe disa lojtarë të Celta-s, por padyshim, negociatat për Lukakun do të jenë pika kryesore e takimit.

Marrëveshja është gjithnjë e më afër, duke i hapur rrugën Napolit për të finalizuar blerjet e Benoit Badiashile nga Chelsea dhe Costantino Favasuli nga Catanzaro. Këta dy lojtarë janë tashmë të bllokuar për t’u bërë përkatësisht qendërmbrojtësi i ri dhe zëvendësi i Di Lorenzës. Pas këtyre lëvizjeve, klubi do të mendojë edhe për ëndrrën Gabriel Jesus, por fillimisht duhet të largohen edhe Lucca dhe ndoshta Lang, për të krijuar hapësirë dhe fonde të nevojshme për blerje të tjera të rëndësishme.

Marrë nga La Gazzetta dello Sport