U rrëzua me biçikletë, Luis Enrique i nënshtrohet një operacioni në Spanjë

Paris Saint-Germain është rikthyer në stërvitje pas pushimit për ndeshjet e kombëtareve, por pa trajnerin e tij. Luis Enrique u detyrua të qëndrojë jashtë pasi javën e kaluar pësoi një rënie me biçikletë, që i shkaktoi frakturë në klavikulë.

Tekniku spanjoll iu nënshtrua një operacioni në Spanjë dhe, sipas gjasave, nuk do të jetë në pankinë të dielën në ndeshjen kundër Lens, e vlefshme për javën e katërt të kampionatit francez.

Klubi parizien nuk ka dhënë detaje të mëtejshme mbi gjendjen fizike të trajnerit, por për momentin drejtimin e seancave stërvitore e ka marrë ndihmësi i tij, Rafel Pol.

Ky incident ka penguar Luis Enrique që të udhëheqë skuadrën pas angazhimeve me kombëtaret, duke krijuar një situatë të pazakontë në prag të një ndeshjeje të rëndësishme në Ligue 1. /Koha Jonë/