U shpall fajtor për shumë akuza, ja cfarë dënimi rrezikon Manchester City sipas rregullores

Manchester City përballet me një nga momentet më të vështira në historinë e tij, pasi një komision i pavarur e ka shpallur klubin fajtor për shkelje të rënda të rregullave financiare të Premier League. Vendimi lidhet me një periudhë nëntëvjeçare, nga sezoni 2009/10 deri në 2017/18.

Sipas gjetjeve të komisionit, “Citizens” kanë përdorur kontrata të manipuluara me disa partnerë komercialë, me qëllim rritjen artificiale të të ardhurave dhe uljen e kostove. Komisioni ka konstatuar gjithashtu se klubi kishte paraqitur pasqyra financiare që nuk pasqyronin gjendjen reale ekonomike dhe kishte shkelur në mënyrë të konsiderueshme kufizimet financiare të Premier League dhe UEFA-s.

Një tjetër pikë e rëndësishme e vendimit lidhet me hetimin e gjatë të Premier League. Komisioni ka arritur në përfundimin se Manchester City ka shkelur disa herë detyrimin për të bashkëpunuar me hetuesit dhe për të vepruar në mirëbesim.

Pavarësisht vendimit, çështja nuk është mbyllur. Manchester City ka konfirmuar se do të apelojë dhe afati për paraqitjen e kërkesës është 2 tetori. Apeli do të shqyrtohet nga një komision i ri, i përbërë nga tre persona.

Ndërkohë, dënimi përfundimtar nuk është përcaktuar ende. Premier League do të zhvillojë një proces të veçantë për të vendosur sanksionet dhe rregullorja nuk parashikon një masë fikse për shkelje të tilla. Në varësi të vendimit, Manchester City mund të përballet me gjobë, zbritje pikësh, ndalim transferimesh apo edhe përjashtim nga Premier League.

A rrezikon City të bjerë në Championship?

Nëse klubi do të dënohej me një zbritje të konsiderueshme pikësh dhe kjo do ta çonte në zonën e rënies, atëherë Manchester City mund të përfundonte në Championship.

Por një përjashtim nga Premier League do të ishte një skenar tjetër. Në këtë rast, City do të duhej të aplikonte për t’u rikthyer në strukturën e futbollit anglez. Sipas rregullave të EFL-së, një klub i ri që pranohet në këtë strukturë duhet të nisë nga League Tëo, niveli i katërt i futbollit profesionist anglez. Vendimi për pranimin e klubit do të kërkonte votën e 72 ekipeve që përbëjnë EFL-në.

Nëse City do të përjashtohej gjatë sezonit, Premier League do të mbetej me 19 skuadra dhe, sipas analizës së Sky Sports, kjo do të sillte edhe ndryshime në numrin e skuadrave që do të binin nga kategoria atë sezon.

City kundërshton vendimin

Manchester City ka reaguar duke kundërshtuar gjetjet e komisionit. Klubi ka deklaruar se është “i zhgënjyer dhe i befasuar” nga vendimi dhe ka këmbëngulur se disponon prova që, sipas tij, mbështesin pozicionin e klubit. City ka bërë të qartë se do të ndjekë të gjitha rrugët e mundshme të ankimit.

Ndërkohë, Premier League e ka cilësuar çështjen si një prej proceseve disiplinore më të rëndësishme në historinë e saj dhe ka bërë të ditur se synon ta përfundojë sa më shpejt edhe fazën e sanksioneve dhe apelimeve.

Tashmë vëmendja është te 2 tetori, afati i fundit për apelin e Manchester Cityt, dhe te vendimi që do të përcaktojë se çfarë pasoja do të ketë për klubin një prej çështjeve më të mëdha financiare në historinë e Premier League.