UEFA drejt marrjes së vendimit për pezullimin e Izraelit për shkak të luftës

Sipas burimeve të afërta me çështjen, UEFA po ecën drejt një votimi për të pezulluar federatën izraelite të futbollit, për shkak të luftës në Gaza. Lajmi është bërë i ditur nga Associated Press, që citon dy burime të ndryshme, të cilat pranuan të flisnin në kushte anonimiteti për shkak të ndjeshmërisë së situatës.

Sipas tyre, shumica e anëtarëve të Komitetit Ekzekutiv të UEFA-s (20 në total) pritet të mbështesin votën për përjashtimin e ekipeve izraelite nga kompeticionet ndërkombëtare. Ky zhvillim vjen vetëm dy javë para se kombëtarja e Izraelit të rikthehet në fushë për kualifikueset e Kupës së Botës 2026, me ndeshje në transfertë kundër Norvegjisë dhe Italisë.

Mbetet e paqartë nëse FIFA do të mbështesë një përjashtim të mundshëm të Izraelit. Kjo edhe për shkak të marrëdhënieve të ngushta mes presidentit të saj, Gianni Infantino, dhe ish-presidentit amerikan Donald Trump. Administrata e Trump ka luajtur një rol të rëndësishëm për të siguruar organizimin e Kupës së Botës 2026 në SHBA, Kanada dhe Meksikë, një turne që FIFA e konsideron jetik për suksesin e saj.