UEFA fal Griezmann, do të jetë në super duelin ndaj Milanit

Atletico Madrid do të presë Milanin në “Wanda Metropolitana” të mërkurën e ardhshme, në ndeshjen që do të vulosë shumë për kualifikimin për në fazën tjetër në Champions.

Diego Simeone ka marrë një lajm të mirë para duelit. UEFA ka përgjysmuar pezullimin e Antoine Griezmann, i cili u ndëshkua me karton të kuq në sfidën e javës së tretë ndaj Liverpool. Sulmuesi francez u dënua me dy ndeshje, njërën e shleu në sfidën e dytë ndaj Liverpool, ndërsa Atletico apeloi vendimin.

UEFA ka dhënë përgjigje pozitive duke falur Griezmann, i cili mund të zbresë në fushë në përballjen kundër nënkampionëve të Italisë. Grupi B kryesohet nga Liverpool me 12 pikë, më pas renditet Porto me pesë pikë, Atletico Madrid me 4, teksa Milani numëron vetëm një pikë.