UEFA do të shpërndajë rreth 31.5 milionë euro për klubet europiane që vunë në dispozicion futbollistët e tyre për ndeshjet e Ligës së Kombeve 2024/25.
Kjo është pagesa e parë në kuadër të ciklit aktual të Programit të Përfitimeve të Klubeve të UEFA-s, i cili bazohet në Memorandumin e Mirëkuptimit mes UEFA-s dhe Klubeve Europiane.
Në total, programi parashikon një fond prej 104 milionë eurosh për klubet që do të lirojnë lojtarët e tyre për ndeshjet e Ligës së Kombeve 2024/25 dhe 2026/27, si dhe për fazën kualifikuese të Euro 2028.
Mekanizmi i shpërndarjes mbetet i njëjtë me atë të edicionit të kaluar. Klubet kompensohen në varësi të numrit të paraqitjeve të futbollistëve të tyre në listat e ndeshjeve të kombëtareve.
Për Ligën e Kombeve dhe ndeshjet kualifikuese të Europianit, kompensimi është 3,845 euro për çdo lojtar dhe për çdo paraqitje. Ndërkohë, për fazën e Euro 2028, pagesa do të llogaritet në bazë të numrit të ditëve që futbollisti qëndron në dispozicion të përfaqësueses së tij.
Skema e UEFA-s përfshin 611 klube nga të gjitha federatat anëtare, duke përfshirë edhe skuadra të niveleve amatore.
Klubi që do të përfitojë shumën më të madhe nga kjo pagesë është RB Leipzig. Skuadra gjermane pritet të arkëtojë rreth 353 mijë euro, pasi ka vënë në dispozicion 16 futbollistë për ndeshjet e kombëtareve.