Uzuni: Sakrifikoj gjithçka për Kombëtaren, luaj në çdo pozicion

Myrto Uzuni ishte një nga protagonistët e fitores 3-0 të Shqipërisë ndaj San Marinos, teksa sulmuesi kuqezi shënoi golin e dytë të sfidës.

Pas ndeshjes, në një prononcim për Tv Klan, Uzuni foli për gatishmërinë e tij për të luajtur në çdo pozicion që i kërkohet nga stafi teknik, duke theksuar se për Kombëtaren është i gatshëm të sakrifikojë gjithçka.

“Gjithmonë jam sakrifikuar në Kombëtare. Të gjithë e dinë që pozicioni im është në të majtë të sulmit. Në Kombëtare jam gati të sakrifikoj çdo gjë vetëm që të jem në fushë”, u shpreh Uzuni.

Sulmuesi kuqezi vlerësoi gjithashtu Sinën, duke i uruar një rrugëtim sa më të gjatë me fanellën e Kombëtares.

“Sinës i uroj sa më shumë ndeshje në Kombëtare. Është lojtar i ri dhe me premisa për të ecur përpara”, deklaroi ai.

Uzuni theksoi se eksperienca e tij i lejon të përshtatet në role të ndryshme në fushë dhe se objektivi i tij kryesor është të jetë në dispozicion të skuadrës.

“Për Kombëtaren jam gjithmonë aty ku ka nevojë. Kam eksperiencën e duhur për të luajtur në çdo pozicion. E vetmja gjë që më bën të lumtur është që të jem në fushë”, tha sulmuesi.

Në fund, Uzuni kishte një mesazh edhe për tifozët kuqezi, duke vlerësuar mbështetjen e tyre ndaj Kombëtares.

“Mirënjohës për të gjithë mbështetësit. I falënderoj të gjithë për mbështetjen. Tifozët janë lojtari ynë i 12-të. Me ta shkojmë shumë lart”, u shpreh Uzuni.