Vitinha mesfushor goleador/ Ka shënuar më shumë se Deco dhe Bernardo Silva në Champions

Mesfushori i Paris Saint-Germain, Vitinha, ka arritur një tjetër moment të rëndësishëm në karrierën e tij. Me golin e shënuar ndaj Chelsea-it në UEFA Champions League, ai është futur në një listë të ngushtë të futbollistëve portugezë që kanë realizuar të paktën 10 gola në kompeticionin më prestigjioz për klube në Europë.

Kjo listë kryesohet nga legjenda Cristiano Ronaldo, i cili mban edhe rekordin absolut të golave në historinë e Champions League me 140 gola. Në total janë 15 futbollistë portugezë që kanë arritur këtë shifër, ndërsa mes tyre vetëm disa vazhdojnë ende të jenë aktivë.

Për Vitinha-n ky është një sukses edhe më domethënës, pasi ai është mesfushori portugez që ka arritur më shpejt në kuotën e 10 golave në Champions League. Lojtari i PSG-së e realizoi këtë arritje në moshën 26 vjeç e një muaj.

Për krahasim, në të njëjtën moshë Bernardo Silva kishte shënuar 7 gola në këtë kompeticion, ndërsa legjenda Deco kishte arritur vetëm 5. Nëse përfshihen edhe sulmuesit, vetëm katër lojtarë portugezë kanë arritur në kuotën e 10 golave më shpejt se Vitinha. Në të njëjtën moshë, legjenda Eusébio kishte realizuar 32 gola, ndërsa Cristiano Ronaldo kishte 26.

Vitinha debutoi në UEFA Champions League në moshën 21-vjeçare me fanellën e Porto gjatë sezonit 2021/22, por në atë edicion nuk arriti të shënonte. Edhe sezonin pasues, tashmë me fanellën e Paris Saint-Germain, mesfushori portugez nuk gjeti rrugën e rrjetës në kompeticion. Në total ai zhvilloi 14 ndeshje në dy sezonet e para pa realizuar gol.

Goli i parë i Vitinha-s në Champions League erdhi më 10 tetor 2024, në moshën 24 vjeç e gjysmë, në një ndeshje të humbur në shtëpi nga PSG me rezultatin 2-3 ndaj Barcelonës. Që nga ajo kohë, mesfushori portugez ka arritur të konsolidohet si një nga protagonistët e skuadrës franceze në arenën europiane.