Vlahovic i jep fitoren e dytë Juventusit ndaj Genoas

Në javën e dytë të Serie A, Juventusi ka marrë një fitore të rëndësishme në transfertë, duke mposhtur Genoan me rezultatin minimal 0-1 në stadiumin “Marassi”.

Pjesa e parë u mbyll pa shumë emocione, me vetëm disa raste të rrezikshme pak para pushimit. Ndeshja u zhbllokua në minutën e 73-të, kur Dusan Vlahovic realizoi me një goditje me kokë pas një krosimi perfekt nga Filip Kostic, duke mos i lënë asnjë mundësi portierit Leali.

Genoa tentoi të reagojë në minutat e fundit, por mbrojtja e rregullt e bardhezinjve dhe pritja vendimtare e Di Gregorio ndaj Ekuban, si dhe traversa e Masinit, vulosën suksesin e dytë radhazi për skuadrën e Tudor.

Me këtë fitore, “Zonja e Vjetër” ngjitet në krye të renditjes me 6 pikë dhe asnjë gol të pësuar pas dy javëve të para të kampionatit.