Vlahovic rikthehet në Torino, por ja kur do të zbresë sërish në fushë

Dusan Vlahovic sheh më në fund dritë në fund të tunelit pas dëmtimit të rëndë të pësuar ndaj Cagliarit. Lajmi është konfirmuar nga Giorgio Chiellini, i cili ka folur për gjendjen e sulmuesit serb dhe afatet e rikuperimit në një intervistë për DAZN. Sipas drejtorit të strategjisë së futbollit te Juventusi, rikthimi i numrit 9 nuk do të jetë i menjëhershëm, pasi bëhet fjalë për një dëmtim të rëndësishëm.

“Vlahovic do të kthehet pas pak kohe dhe jo shumë shpejt, është një dëmtim i rëndësishëm. Prandaj u lëvizëm për të marrë një sulmues, në përputhje me situatën financiare”, u shpreh Chiellini, duke sqaruar edhe arsyen pse bardhezinjtë u hodhën në merkato gjatë janarit.

Duke iu referuar projeksionit të dhënë nga Chiellini, Vlahovic pritet të rikthehet në dispozicion të Juventusit mes fillimit dhe mesit të marsit, pra pas rreth 4-6 javësh.

Ndërkohë, sulmuesi serb ka nisur punën në Continassa, ku ka hyrë në fazën e riatletizimit, nën mbikëqyrjen e stafit përgatitor të klubit bardhezi. Juventusi shpreson që rikthimi i tij të përkojë me fazën vendimtare të sezonit, ku objektivat në kampionat dhe kupë kërkojnë një Vlahovic në formë të plotë.