Vllaznia drejt shkarkimit nga Vllaznia, ja kush pritet të emërohet në vend të tij

Edi Martini pritet të mos jetë më trajner i Vllaznisë. Drejtuesit shkodranë kanë vendosur të shqyrtojnë ndërprerjen e bashkëpunimit me teknikun, pas rezultateve negative në javët e para të sezonit.

Vllaznia ka grumbulluar vetëm 2 pikë në pesë ndeshje, rezultat që e ka lënë skuadrën në fundin e renditjes së kampionatit. Situata ka shtyrë drejtuesit të mendojnë për një ndryshim në stol, ndërsa ndërprerja e kampionatit u ka dhënë mundësinë për të marrë një vendim dhe për të gjetur një zëvendësues.

Megjithatë, deri në këto momente nuk ka ende një konfirmim zyrtar për largimin e Martinit. Martini mori drejtimin e Vllaznisë në maj të vitit 2025, me objektivin për ta rikthyer skuadrën te titulli kampion. Sezonin e kaluar, shkodranët arritën deri në “Final Four”, por nuk e realizuan objektivin madhor.

Këtë verë, Vllaznia pësoi ndryshime të rëndësishme në përbërjen e skuadrës, ndërsa rezultatet e fillimit të sezonit kanë qenë larg pritshmërive. Nëse largimi i Martinit zyrtarizohet, një nga emrat kryesorë për ta marrë drejtimin e Vllaznisë është Zekirije Ramadani. Trajneri shqiptar nga Maqedonia e Veriut aktualisht është pa klub, pasi u nda nga Drita gjatë verës.

Ramadani ka një eksperiencë të konsiderueshme në futbollin shqiptar. Ai ka drejtuar më herët ekipe si Flamurtari dhe Egnatia, ndërsa me Dritën u shpall kampion i Kosovës dhe sezonin e kaluar drejtoi skuadrën në fazën e grupeve të Conference League.