Vllaznia kualifikohet në finalen e titullit, Balaj mund Dinamon

Vllaznia ka siguruar një biletë për finalen e madhe të titullit kampion, pas një fitoreje të merituar 2-1 ndaj Dinamos në “Arenën Kombëtare”. Shkodranët bënë diferencën në pjesën e parë, ku protagonist absolut ishte Bekim Balaj, i cili realizoi dy herë nga pika e bardhë e penalltisë, duke i dhënë ekipit të tij avantazhin e nevojshëm për kualifikim.

Dinamo u zgjua në fraksionin e dytë, ku arriti të ngushtojë shifrat me një gol të shënuar nga Mandela dhe krijoi disa mundësi të tjera për barazim, por pa arritur t’i konkretizonte. Përpjekjet e tyre nuk mjaftuan për të ndryshuar fatin e ndeshjes.

Me këtë sukses, Vllaznia bëhet skuadra e parë finaliste dhe do të presë me qetësi për të mësuar rivalin që do të dalë nga dueli mes Egnatias dhe Partizanit. Një tjetër hap i rëndësishëm për shkodranët në rrugën drejt titullit kampion.