Yildiz driblon për të ardhmen: Nuk flas për kontratën, ndihem mirë te Juvja!

E ardhmja e Kenan Yildiz është një nga çështjet më të rëndësishme në shtëpinë e Juventusit. Talenti i lindur në vitin 2005 ka kontratë deri në vitin 2029, por interesimi i shtuar nga klubet e mëdha po shtyn drejtuesit bardhezinj të reflektojnë mbi rinovimin dhe përmirësimin e kushteve ekonomike.

Megjithatë, vetë Yildiz nuk dëshiron të shpërqendrohet. “Kontrata? Nuk flas për të. Jam i përqendruar vetëm te fusha dhe te ajo që duhet të bëj këtu. Ndihem mirë te Juventusi dhe kjo është gjëja më e rëndësishme. Këtu është shtëpia ime”, ka deklaruar ai.

Pas fitores së Juventusit ndaj Benficës, në një intervistë për TRT Spor, Yildiz theksoi rëndësinë e Champions League: “Champions-i është gjithmonë i veçantë, por duhet përgatitur si çdo ndeshje tjetër, edhe në Serie A. Duhet të japim 100%. Stërvitemi mirë dhe punojmë shumë, sepse në Champions duam të shkojmë deri në fund”.

Talenti bardhezi komentoi edhe vlerësimet e Luciano Spallettit: “Ka thënë se më do si djalin e tij. Te Juventusi ndihem shumë mirë, kjo është skuadra ime. Me trajnerin kam një marrëdhënie të veçantë”.

Sa i përket krahasimeve me Lamine Yamal, Yildiz u tregua i matur: “Është një lojtar i madh, ndër më të fortët në botë. Nuk më pëlqejnë krahasimet, dua vetëm të përmirësohem dhe të jap maksimumin për Juventusin dhe tifozët”.