Zabaleta: Sfida ndaj Serbisë me rrezikshmëri të lartë, ëndrra jonë është Botërori!

Pablo Zabaleta, ndihmësi i trajnerit Sylvinho në pankinën e Shqipërisë, ka folur për Flashscore rreth rrugëtimit të kuqezinjve drejt Botërorit dhe sfidës delikate që i pret në tetor ndaj Serbisë.

“Shkuarja në Botëror është ëndrra jonë. Aktualisht jemi në vend të dytë, shtatë pikë pas Anglisë, por një pikë përpara Serbisë. Ndeshja e radhës është në fushën e tyre, edhe pse nuk do të luhet në Beograd. Është një sfidë që kërkon kujdes të madh, sepse më 2016 pati probleme pas incidentit me dronin,” tha ish-mbrojtësi argjentinas.

Zabaleta e sheh përplasjen me Serbinë si më shumë se një duel sportiv: “Është një ndeshje me rrezikshmëri të lartë shoqërore, por ne jemi të fokusuar vetëm te futbolli dhe objektivi ynë është kualifikimi në Botëror.”

I pyetur për rëndësinë që do të kishte një sukses i tillë për një vend me më pak se 3 milionë banorë, Zabaleta e mbylli me buzëqeshje: “Po arritëm ta bëjmë, besoj se do të na ndërtojnë një statujë në Tiranë.”