Zanetti “paralajmëron” PSG: I kemi shënuar 7 gola Barcelonës!

Zëvendëspresidenti i Interit, Javier Zanetti, ka vlerësuar punën e trajnerit Simone Inzaghi, duke e cilësuar rrugëtimin e zikaltërve në Champions League si shumë pozitiv.  Në një intervistë për ESPN, legjenda argjentinase ka folur për sfidat që ka përballuar skuadra dhe për rëndësinë e arritjes në finale.

“Faza e grupeve shkoi mirë. Humbëm vetëm një ndeshje, atë ndaj Bayer Leverkusen në minutën e fundit. Pastaj përballja në çerekfinale me Bayernin, një ekip me histori të gjatë në këtë kompeticion, dhe më pas Barcelona, një skuadër me identitet të fortë dhe shumë lojtarë të rinj,” – u shpreh Zanetti.

Ai theksoi forcën sulmuese të Interit, veçanërisht ndaj katalanasve: “Shënuam 7 gola kundër Barcelonës, kjo tregon se kur Interi sulmon, e bën me efikasitet të madh.”

Për finalen ndaj Paris Saint-Germain, Zanetti ka vetëm fjalë respekti: “Jemi me Inzaghin prej katër vitesh dhe jemi të kënaqur me punën e tij. Interi është gjithmonë pretendent, është një klub që respektohet në Europë. E rëndësishme është që arritëm në finale. PSG është një skuadër e fortë. Kam shumë admirim për Luis Enrique-n, i cili u ka dhënë një identitet të qartë dhe të fortë. Prandaj janë aty ku janë sot.”