Zidane: Juve nuk më ka telefonuar, por të nesërmes nuk i dihet!

Zinedine Zidane shuan zërat që janë përhapur në orët e fundit për të marrë drejtimin e Juventusit, por ka lënë gjithçka të hapur në lidhje me të ardhmen. “Daily Mail” ditën e djeshme raportoi për një akord me klubin torinez, por duket se e vërteta nuk qëndron kështu.

“Nuk më ka telefonuar askush, unë mendoj vetëm për Realin. Nuk di asgjë, janë thënë shumë gjëra. Ndihem i mbështetur nga klubi, të gjithë qëndrojmë në pozicionet  tyre. Sot jam trajneri i Realit, nesër kjo gjë mund të ndryshojë.

Pankina e Realit është një përgjegjësi, por edhe fat që jam këtu. Futbolli gjithmonë ka qenë pasioni im i madh, bëj atë që më pëlqen. Jam krenar që jam pjesë e Realit dhe e shijoj çdo moment, edhe pse futbollistët janë ata që shkruajnë historinë”, deklaroi Zidane në konferencën për mediat. /R.Lika-Koha Jone/