Zvicra e Xhakës dhe Shaqirit eliminon Serbinë, Kameruni mund Brazilin (VIDEO)

Brazili dhe Zvicra janë dy skuadrat e fundit që siguruan një biletë për në 16 më të mirat e Kupës së Botës në Katar, ndërkohë që Serbia dhe Kameruni kthehen në shtëpi.

Skuadra zvicerane mori një fitore të madhe 3-2 ndaj Serbisë, një ndeshje që do të dhuronte jo pak emocione. Shaqiri shënoi një super gol në minutën e 20-të, duke u konfirmuar si makth për rivalët. Serbia u kundërpërgjigj duke përmbysur shifrat që në pjesën e parë.

Dy sulmuesit Mitrovic dhe Vlahovic do të realizonin dy gola për pak minuta. Zvicra gjithsesi do të shënonte golin e barazimit me Embolo në fundin e pjesës së parë.

Në fillimin e së dytës, Freuler shënoi dhe golin e tretë pas një aksioni fantastik, ku ishte protagonist dhe Shaqiri. Në minutën e 66-të, Granit Xhaka i ka kthyer provokimin Vlahovic, i cili në pjesën e parë tregoi pjesët intime ndaj kundërshtarëve.

Tashmë ishte Xhaka që ka bërë një veprim të ngjashëm pas protestave të serbëve. Ata kanë tentuar të hyjnë në fushë por arbitri i ndali duke i ndëshkuar me karton të verdhë. Serbia nuk kishte më forcë reagimi dhe do të dorëzoheshin në fundin e takimit.

Kameruni mori një fitore 1-0 ndaj Brazilit në fundin e ndeshjes. Vincent Aboubakar shënoi golin e vetëm në minutën e dytë shtesë të ndeshjes.