Lionel Messi barazon rekordin e Xavit te Barcelona

Lionel Messi u shfaq në formën më të mirë ndaj Alaves duke shënuar 2 gola dhe duke dhënë një asist. Përtej fitores, në aspektin personal kjo sfidë shënoi një tjetër arritje për 33-vjeçarin, i cili barazoi rekordin e legjendës Xavi Hernandez (aktualisht trajner i Al-Sadd në Katar) me plot 505 ndeshje me fanellën “blaugrana” në La Liga.

Së shpejti do të thyejë rekordin e Xavit sa i përket numrit të ndeshjeve në total. Ish-mesfushori, kur u tërhoq nga Barcelona, kishte zhvilluar 767 takime, ndërsa Messi kundër Alavesit luajti takimin numër 759.

Messi i është bashkuar ekipit të parë në moshë më të re se Xavi. Debutoi në La Liga në radhët e Barcelonës kur ishte 17 vjeç, tre muaj dhe 21 ditë, në Espanyol-FC Barcelona (0-1), ndërsa Xavi në debutim ishte 18 vjeç, 8 muaj dhe 7 ditë, në Valencia-FC Barcelona (1- 3).

Me 505 ndeshje në La Liga, Messi tashmë në top-10. Rekordmeni mbetet Andoni Zubizarreta me 622 ndeshje, i ndjekur nga Joaquín Sánchez 567. Më pas vijnë Raúl González (550), Eusebio Sacristán (543), Paco Buyo (542), Manolo Sanchis (523), Iker Casillas (510) dhe Sergio Ramos (506).