Filmi i parë artistik i prodhuar në Shqipëri në realitet virtual 360º

Teknologjia dhe arti u takuan të Hënën në mbrëmje në shfaqjen premierë të filmit të shkurtër ‘Një Histori nga Cirku’ në sallën e Cineplexx tek qendra TEG në Tiranë. Për herë të parë shikuesit mund të shihnin një film përmes pajisjeve të realitetit virtual në vend të një ekrani të madh.

“Jam e kënaqur që ishim në gjendje të mbështetnim një projekt kaq inovativ me një qasje ndryshe në prodhimi e filmit”, tha Debora Kern, përfaqësuese e Ambasadës së Zvicrës. “Jo vetëm që ky film është një mënyrë e re e tregimit të historive por ai gjithashtu prek çështje social siç është integrimi i personave me aftësi të kufizuara”, shtoi ajo.

“Megjithëse modeste, mbështetja jonë i shkoi një ekipi të rinjsh të cilët ende përpiqen të jetojnë përmes artit të tyre. Shpresojmë që me realizimin e këtij filmi, prodhuesit e rinj të inkurajohen për të mësuar dhe për të gjetur më shumë kanale për financimin e ideve të tyre”, tha Dritan Mezini, drejtor ekzekutiv i Fondit Kulturor Zviceran.

Të pranishëm në aktivitet ishin edhe përfaqësues nga sektori i filmit në Shqipëri përfshirë edhe drejtorin e Qendrës Kombëtare të Filmit, Ilir Butka.

Gjatë 15 minutave të filmit shikuesit përjetuan një udhëtim virtual nëpër ngjarjet e ndryshme që ndodhin brenda një çadre cirku. Teknologjia VR lejon shikuesit që të rrotullojnë këndin e vështrimit dhe të shohin çfarë po ndodh në 360 gradë. Kjo do të thotë se tregimi i historisë ndryshon nga filmat tradicionalë: kamerat kapin gjithçka ndodh përreth.

Kjo përvojë e shikimit mundësohet përmes kombinimit të kamerave special që perdoren në krijimin e filmit si dhe pajisjeve individuale VR (realitet virtual) të cilat shikuesit i veshin gjatë shfaqjes.

Fondi Kulturor Zviceran është një projekt i Agjencisë Zvicerane për Zhvillim dhe Bashkëpunim (SDC) i cili synon të mbështesë artistë të rinj dhe të sapodalë përmes granteve, programeve të bashkëpunimit rajonal dhe forcimit të kapaciteteve. Projekti zbatohet nga Centre for Business Technology and Leadership (CBTL).