Këngëtari arbëresh Cacozza sjell versionin e tij të këngës “Moj e bukura more” (VIDEO)

Këngëtari i njohur arbëresh Pino Cacozza, i njohur edhe si Zef Kakoca, ka publikuar ditët e fundit variantin e kënduar prej tij të këngës së njohur “Moj e bukura More” (Mia bella Morea).

Kjo këngë që cilësohet edhe si një himn i emigrimeve, i dhimbjes dhe i nostalgjisë së të larguarve nga vendi amë, është ndër këngët arbëreshe të interpretuara më shpesh, përfaqësuese e muzikës arbëreshe. Cacozza e ka hedhur tashmë në rrjetin youtube interpretimin e tij të shoqëruar me video, e cila ka një sfond të palëvizshëm të një pikture nostaligjike, dhe shoqëroret me tekstin në lëvizje.

Orkestrimin e këtij interpretimi origjinal e ka realizuar artisti Lirio Nushi, ndërsa regjistrimin e zërit dhe miksazhin e audios e ka realizuar nipi i këngëtarit, Nicolla Bellucci.

Në grupin e punës përfshihet edhe studiuesi dhe autori i disa botimeve mbi arbëreshët dhe veshjet e tyre, Italo Elmo, i cili ka realizuar ripunimin fotografik të videos.

Këngëtari ka në kanalin e tij në Youtube 11 këngë.