1/3 e fëmijëve 7-9 vjeç në Shqipëri, janë në mbipeshë

Afro 1/3 e fëmijëve të grupmoshës 7-9 vjeç në Shqipëri janë mbipeshë dhe 14% obezë. Të dhënat bëhen të ditur në raportin e OBSH për Europën, referuar informacioneve të përpiluara edhe nga ISHP.

Shqipëria qëndron në vend të 12 nga 37 vende në studim për nivelin e mbipeshës dhe obezitetit tek fëmijët. Sipas specialistëve, të dhënat tregojnë se nga viti në vit, po rritet numri i fëmijëve mbipeshë dhe obezë.

Krahasuar me studimin e fundit në 2020, përqindja e fëmijëve mbipeshë dhe obezë është rritur me 4 pikë. Përsa i përket vendeve të Ballkanit, Shqipëria është në të njëjtin nivel me vendet e rajonit.

Sipas specialistëve, ulja e mbipeshës është mjaft e rëndësishme për popullatën, pasi janë faktor risku për sëmundjet kronike, si ato kardiovaskulare, hipertensioni dhe diabeti.