Aktivistja Sidorela Vatnikaj foli në protestën e 116-të, ku komentoi zhvillimet e fundit politike dhe arrestimet e bujshme të ditëve të fundit. “Arrestimi i drejtores së SHISH, pasi bashkëpunonte me Agasin, nuk është vetëm një këmbanë alarmi, por na lë me një pikëpyetje të madhe. Kur e ka radhën Edi Rama, si kreu i kësaj bande kriminale?”, u shpreh Vatnikaj.
Ajo solli në vëmendje edhe çështjet që lidhen me Saimir Tahirin, Veliajn dhe Ballukun, duke pretenduar se veprimet e tyre nuk mund të jenë kryer pa dijeninë apo urdhrin e kryeministrit.
“Askush nuk e beson sot që Saimir Tahiri e kanabizoi vendin pa dijeni dhe pa urdhrin e Ramës. Askush nuk e beson sot se Veliaj e bëri korrupsionin me inceneratorët pa urdhër të Ramës. Askush nuk e beson dot që Balluku e ka bërë korrupsionin pa urdhër të Ramës. Prandaj jemi në këtë shesh: kur e ka radhën Rama?”, deklaroi ajo.
Në vijim, aktivistja tha se protestuesit kërkojnë të jetojnë me dinjitet dhe të mos ulin kokën përballë pushtetit. Ajo theksoi gjithashtu se qëllimi i protestës nuk është marrja e pushtetit. “Nuk jemi këtu për pushtet, por për të larguar këtë klasë politike”, përfundoi Vatnikaj.
