16 vite burg për vrasjen e Martin Canit, babai: Pretendonim më shumë, dhimbje e paimagjinueshme

Drejtësia vulos vendimin për autorin që i mori jetën Martin Canit. Gjykata e Apelit la në fuqi vendimin me 16 vite burg, për autorin i cili në kohën e krimit, 18 nëntorin e vitit 2024, ishte 14 vjeç. I njëjti vendim ishte dhënë në dhjetor të 2025-ës, nga Gjykata e Tiranës, por ishin familjarët e Martin Canit që e apeluan, duke kërkuar një dënim më të rëndë për autorin, 18 vite burg.

“Kjo që na ka ndodhur ne mos i ndodhtë kujt, dhimbja jonë është shumë e madhe dhe e paimagjinueshme. Ligjet janë ligje, ne pretendonim më shumë. Ka dy rrethana cilësuese. Dhimbja jonë nuk hiqet asnjëherë”, tha Engjëll Cani, babai i viktimës.

Vrasja që tronditi mbarë opinionin publik, ndodhi pas një konflikti që kishte shpërthyer në rrjetet sociale mes të miturve, krim që çoi qeverinë në vendimin për të mbyllur 1 vit TikTok-un. Më 18 nëntor të 2024, sapo dy bashkëmoshatarët përfunduan mësimin te “Fan Noli”, shkuan për sqarim në një rrugicë pranë shkollës.

Autori qëlloi disa herë me thikë Martin Canin, duke i shkaktuar plagë vdekjeprurëse, dhe la të plagosur një nga shokët e 14-vjeçarit, i cili i kishte shkuar në ndihmë.