19 vjet nga tragjedia e 9 janarit, familjarët kërkojnë drejtësi: SPAK nuk nis hetimet

28 shqiptarë humbën jetën në detin Jon në vitin 2004, dhe kur kanë kaluar 19 vite nga tragjedia, familjarët nuk reshtin së kërkuari drejtësinë e munguar.

“Nuk na kanë dhënë, e nuk na japin drejtësi! Aq sa punojmë ne për zbardhjen e ngjarjes, aq punojnë ata kriminel të veshur me pushtet që bëjnë punën e vet që të mos zbardhet. Fajin e ka prokuroria, se çështja penale asnjëherë s’ka kaluar në gjykatë. Nëse zbardhet, deputetë e ministra përfundojnë në burg”, tha Nikolle Mhilli, anëtar i shoqatës “9 Janari”.

Çështja nuk është hetuar, ndaj dy vite më parë, shoqata ”9 janari” dorëzoi padinë në SPAK me shpresë tek strukturat e reja të drejtësisë. Tashmë kanë marrë një përgjigje negative.

28 shqiptarë, pjesa më e madhe e tyre nga qarku i Shkodrës u mbytën në detin e trazuar më 9 janar të 2004-ës, teksa kishin ndërmarrë lundrimin me gomone drejt Italisë. 18 burra e 3 gra u gjenden të pajetë mëngjesin 10 janarit, 8 persona rezultojnë të zhdukur, njëmbëdhjetë të tjerët mundën të shpëtonin, mes tyre dhe skafistët.