Në “Etihad Stadium”, Manchester City dhuroi një ndeshje fantastike duke mposhtur me rezultatin e thellë 4-0 Liverpoolin, duke prerë biletën për në gjysmëfinalen e FA Cup.
Protagonisti absolut i sfidës ishte Erling Haaland, i cili hapi serinë e golave në minutën e 39-të nga pika e bardhë e penalltisë. Sulmuesi norvegjez nuk u ndal me kaq, pasi në minutën e dytë shtesë të pjesës së parë dyfishoi shifrat, pas një asistimi nga Antoine Semenyo.
Në pjesën e dytë, City vazhdoi dominimin total. Ishte pikërisht Antoine Semenyo që shënoi golin e tretë në minutën e 50-të, pas një aksioni të ndërtuar bukur dhe asistit të Rayan Cherki. Vetëm shtatë minuta më vonë, Haaland kompletoi paraqitjen e tij të jashtëzakonshme duke realizuar golin e katërt dhe personalin e tretë, këtë herë pas një asistimi nga O’Reilly.
Nga ana tjetër, Mohamed Salah pati mundësinë të ngushtonte diferencën për Liverpoolin në minutën e 64-të, por penalltia e tij u prit nga portieri i Cityt, duke vulosur një mbrëmje zhgënjyese për “The Reds”. Tifozët e braktisën skuadrën që pas 1 ore lojë.
