25 vatra zjarri në 24 orë, drejtori Cara: Jemi në fazën më kritike të sezonit

Situata e zjarreve në vend vijon të jetë nën kontroll të vazhdueshëm nga strukturat përgjegjëse, ndërsa temperaturat e larta dhe mungesa e reshjeve kanë shtuar rrezikun për përhapjen e flakëve.

Drejtori i Përgjithshëm i Mbrojtjes nga Zjarri dhe Shpëtimi, Arben Cara, thotë se gjatë 24 orëve të fundit janë evidentuar rreth 25 vatra zjarri në zona të ndryshme të vendit. Tre prej tyre vijojnë të jenë aktive dhe po monitorohen nga afër nga ekipet e emergjencave.

Sipas Carës, vatrat që paraqesin më shumë shqetësim ndodhen në Priskë, Dardhë dhe Mallakastër. Kjo e fundit konsiderohet zona më problematike për shkak të sipërfaqeve të mëdha me pisha dhe vështirësisë së terrenit. ”Jemi në periudhën më të ndjeshme të sezonit veror. Temperaturat e larta dhe thatësira krijojnë kushte që edhe një shkëndijë e vogël të shkaktojë pasoja të mëdha”, u shpreh Cara.