Aksidentet rrugore vijojnë të marrin jetë në akset kryesore të vendit. Vetëm nga 1 qershori deri më 25 korrik, 28 persona kanë humbur jetën në ngjarje rrugore, ndërsa janë regjistruar rreth 240 aksidente me shumë të plagosur.
Një nga zonat problematike mbetet Unaza Lindore e Tiranës drejt rrethrrotullimit të TEG-ut, ku shpejtësia e lartë ka shkaktuar disa aksidente fatale. Rasti më i fundit ishte ai i mjetit betonierë që përfundoi poshtë autostradës, duke shkaktuar vdekjen e dy personave.
Sipas të dhënave të INSTAT, në pesë muajt e parë të vitit janë regjistruar 547 aksidente, me 766 persona të vrarë ose të plagosur. Shkaqet kryesore lidhen me shpejtësinë, shtimin e numrit të automjeteve dhe fluksin e lartë të turistëve gjatë sezonit veror.
Pavarësisht rritjes së masave ndëshkuese, ku në vitin 2025 u vendosën mbi 1 milion gjoba për shkelje të ndryshme, aksidentet vazhdojnë të mbeten një problem serioz. Ndryshimet e reja në Kodin Rrugor, që hyjnë në fuqi në gusht, synojnë të ashpërsojnë masat ndaj drejtuesve që shkelin rregullat, veçanërisht atyre që drejtojnë mjetin nën efektin e alkoolit.