3 raste brenda një jave, Ministrja tërhiqet para studentëve

Ndryshe nga Lindita Nikolla, ministrja e re e Arsimit, Besa Shahini ka refuzuar në tre raste brenda një javë që të flasë për protestën e studentëve dhe për ligjin e Arsimit të Lartë.

Sot Shahini kishte lënë një takim me studentët e Shkodrës por e anulloi dhe për këtë shpjegimin e dha në facebook. ”Keqardhje ndaj dhjetra studentëve të Universitetit të Shkodrës që më kishin kërkuar takim për të diskutuar për #paktinpëruniversitetin me kushtin që takimi të bëhej pa media, e që nuk erdhën sepse salla ishte mbushur me kamera. Jam në dispozicion për takim tjetër kurdoherë”, shkruan Shahini.

Ky nuk është takimi i parë nga i cili Shahini tërhiqet, kur bëhet fjalë për Ligjin e Arsimit të Lartë dhe studentët. Ditë më parë, Shahini në debat e sipër me anëtarët e komisionit, braktisi Komisionin e Arsimit. Ndërsa po sot por në konferencë për shtyp, ministrja nuk iu përgjigj pyetjeve të gazetarëve pas takimit me pedagogët.