34 vatra zjarri në 24 orë, 5 vijojnë të jenë aktive në Tiranë dhe Dibër. Situatë kritike edhe në Xhyrë

Situata me zjarret në vend vijon të mbetet nën monitorim, pasi gjatë 24 orëve të fundit janë raportuar 34 vatra zjarri. Sipas të dhënave të Ministrisë së Mbrojtjes, 5 vatra janë ende aktive, ndërsa 2 të tjera po mbahen nën mbikëqyrje. Për përballimin e situatës janë angazhuar 481 forca operacionale dhe 44 automjete zjarrfikëse. Në terren po asistojnë gjithashtu 105 efektivë të Forcave të Armatosura, 2 automjete zjarrfikëse të FA-së, 3 helikopterë dhe një avion “Air Tractor”.

Vatrat më problematike janë përqendruar në qarqet Tiranë dhe Dibër. Në Malin e Dajtit, pas riaktivizimit të tre vatrave, operacionet për shuarjen e flakëve vijojnë me pjesëmarrjen e 25 forcave zjarrfikëse dhe të Agjencisë së Zonave të Mbrojtura, si dhe 20 efektivëve të Forcave të Armatosura.

Në qarkun e Dibrës, zjarret janë ende aktive në Qafë të Helmës, Vajkal, Sllatinë dhe Komsi. Në Vajkal po ndërhyjnë 61 forca, përfshirë 30 efektivë të FA-së, ndërsa në Sllatinë operojnë 78 forca. Në Komsi janë angazhuar gjithashtu 25 efektivë të Forcave të Armatosura. Autoritetet bëjnë me dije se aktualisht nuk ka rrezik për banesat në këto zona.

Ndërkohë, në qarkun e Elbasanit, zjarret në Malin e Dardhës dhe Malin e Qukësit janë nën kontroll dhe vijojnë të monitorohen, pa paraqitur rrezik për zonat e banuara. Gjatë së premtes, ndërhyrje u kryen edhe në Tërbaç dhe Vranisht të Himarës, ku në operacione u përfshinë forca tokësore, dy helikopterë dhe një avion “Air Tractor”.

Në Xhyrë të Librazhdit ndërhyrja u realizua edhe me një helikopter të Forcave të Armatosura. Sipas Ministrisë së Mbrojtjes, vatrat në Himarë dhe Librazhd tashmë janë shuar, ndërsa operacionet vijojnë në zonat ku zjarret mbeten aktive.