4 fshatra nën pushtetin e flakëve

Temperaturat përvëluese të së mërkurës u shoqëruan me disa vatra zjarri në periferi të Tiranës, të cilat brenda pak orësh morën përmasa të mëdha dhe dogjën qindra hektarë sipërfaqe. Pasojat e zjarreve janë të dukshme mëngjesin e së enjtes. Hiri ka mbuluar zonat e prekura, ndërsa tymi vijon të ngrihet mbi kodra. Flakët shkrumbuan një pjesë të konsiderueshme të kurorës së gjelbër në Priskë të Madhe, Lundër, Gurrë të Vogël dhe Daias.

Dëmet më të mëdha janë shkaktuar në pyje, ullishte dhe pemë frutore. Terreni i thyer malor vështirësoi ndërhyrjen e forcave zjarrfikëse nga toka, të cilat mundën të vepronin kryesisht në zonën e Daiasit. Për shuarjen e flakëve u angazhuan edhe helikopterët, veçanërisht në Priskë të Madhe dhe Gurrë të Vogël, ku zjarri iu afrua disa herë banesave. Si masë sigurie, të paktën 10 familje u evakuuan, ndërsa tre objekte të vjetra dhe të pabanuara u përfshinë nga flakët dhe u dogjën.

Situata e krijuar lidhet me temperaturat e larta, thatësirën dhe bimësinë e tharë, ndërsa autoritetet nuk përjashtojnë as pakujdesinë dhe zjarrvënien e qëllimshme si faktorë që mund të kenë favorizuar përhapjen e flakëve. Zjarret e ditëve të fundit rikthejnë edhe një herë vëmendjen te rreziku i lartë i përhapjes së flakëve gjatë periudhave të nxehta dhe të thata, veçanërisht në zonat pyjore dhe pranë banesave.